Тишина над Газа за првпат по 15 месеци
Небото над Газа остана тивко за првпат по 15 месеци, откако започна првата фаза од договорот меѓу Израел и Хамас. Во рамките на оваа фаза, се спроведе размена на првите три израелски заложнички за палестински затвореници. Преку преминот Рафах минуваат стотици камиони со хуманитарна помош, додека се очекуваат илјадници повеќе за да го поддржат погоденото палестинско население.
Изјави од двете страни
- „Во овој договор има ризици и предизвици. Ние сме подготвени и знаеме како да одговориме на сите предизвици. Знаеме како да се вратиме и да се бориме, да застанеме во одбрана на сите цели на војната,“ изјави Даниел Хагари, портпаролот на армијата на Израел.
Од страна на Хамас беше упатено предупредување дека секое прекршување на условите од договорот може сериозно да влијае врз безбедноста на заложниците.
- „Ние, заедно со нашите браќа во палестинските фракции на отпорот, ја објавуваме нашата посветеност на договорот за прекин на огнот и нашата подготвеност да ги спроведеме неговите одредби. Притоа нагласуваме дека сето ова зависи од посветеноста на непријателот,“ изјави Абу Обеида, портпарол на бригадите Касам, воено крило на Хамас.
Мешани чувства во Израел и Газа
Во Израел, јавноста бара ослободување на сите заложници, кои беа киднапирани по нападот на 7 октомври 2023 година. Во Газа, по 470 дена раселување, многу жители почнаа да се враќаат во своите домови, но ги дочекаа целосно уништени населби и патишта. Луѓето бараат обнова на земјата и подобра иднина.
Посредници и фази на договорот
Договорот за прекин на огнот беше постигнат со посредство на САД, Катар и Египет. Во рамки на првата фаза, која ќе трае 42 дена, се очекува ослободување на уште 30 израелски заробеници во замена за палестински затвореници.