Нови тензии меѓу Анкара и Атина околу морската граница
Турција повторно испрати остри пораки кон Грција во врска со деценискиот спор за територијалните води во Егејското Море, по изјави на советник на претседателот Реџеп Таип Ердоган дека проширување на грчките води од шест на 12 наутички милји би се сметало за повод за војна.
Како што пренесува грчкиот весник „Екатимерини“, академикот и претседателски советник Чагри Ерхан изјавил дека одлуката на турскиот парламент од 1995 година останува во сила и дека претставува официјален став на Анкара.
„Доколку Грција ги прошири своите територијални води дури и за еден сантиметар, тоа би било повод за војна“, изјавил Ерхан, додавајќи дека концептот „Сина татковина“ не треба да се толкува како директна закана кон Грција.
Спор што трае со децении и нови геополитички тензии
Спорот меѓу двете земји трае со децении и се однесува на контролата врз островите и поморските зони во Егејското Море. Турција смета дека грчките острови го ограничуваат нејзиниот пристап до море и нејзините поморски права.
Грција, пак, инсистира дека има право да ги прошири територијалните води на 12 наутички милји, согласно Конвенцијата на Обединетите нации за поморско право.
Анкара најавува нови чекори во поморската политика
Турските медиуми објавуваат дека се подготвува регулатива со која претседателот на Турција би добил овластување еднострано да прогласува ексклузивна економска зона до 200 наутички милји.
Според анализите, ваквиот потег би можел дополнително да ги зголеми тензиите во Источниот Медитеран, особено имајќи предвид дека Турција не ја има ратификувано Конвенцијата на ОН за поморско право, која бара договор со соседните држави за вакви зони.