Во најновата партиска реакција, ВМРО-ДПМНЕ ја критикува седумгодишната власт на СДСМ. Тие наведуваат дека периодот бил обележан исклучиво со тендери и низа спорни постапки. Според ВМРО-ДПМНЕ, тоа го одредувало карактерот на владеењето и политиките на СДСМ.
„Тоа значи тендери како политика, тендери и како идеологија, па дури можеби и како лична агенда. Филипче се обидува да ја изгради улогата на морален коректив во опозиција, ама јасно е дека нивната матрица не се менува – прво направи хаос, па направи уште поголем хаос да го прикриеш првиот, обвини некој трет, изигрувај жртва.“, соопшти ВМРО-ДПМНЕ.
Во продолжение се посочува дека во периодот 2019–2021 година, кој партијата го нарекува „златна ера на тендерските шеми“ на Зоран Заев и Венко Филипче, биле отпишани 2.000 тони јачмен и пченица од стоковите резерви. Тоа било во вредност од околу 800.000 евра. Според соопштението, „пченицата инаку била во употреблива состојба. Понатаму, направен е записник кој го негира тоа и донесен на владина седница. Ова се случило кога Филипче е дел од владината структура“. Понатаму се наведува дека, за да се прикрие ситуацијата, биле склучени два тендери за набавка на 20.000 тони од соседна држава. Ова било со цел пополнување на залихите. „Заев, Филипче и Николовски ги убедуваа граѓаните дека сè е под контрола, дека сè функционира професионално. Но за ова трио тоа значеше само дека внимателно си ги контролираат тендерите“, се вели во соопштението.
Партијата дополнително прашува „и сега, како може СДСМ да се реформира кога самиот лидер е дел од истите шеми за кои избегнува да зборува“.
Во завршниот дел од реакцијата, ВМРО-ДПМНЕ додава: „Наместо да се оградат, СДСМ го продава Филипче како ново лице на опозицијата и партијата ќе продолжи да тоне бидејќи не може човек кој не ја заштити државата кога беше на власт, сега да дели совет додека е во опозиција“.