Во градот Ветлет во централниот дел на Мјанмар се убиени две лица, други две во одделни акции на припадници на воената хунта во два града на североисток и едно лице во рударскиот град Хпакант во северниот дел на земјата.
Три месеци по воениот преврат и соборувањето на демократски избраната влада, илјадници граѓани и денеска излегоа на улиците во Мјанмар за да протестираат против воената диктатура.
Воената хунта не успева да ги запре протестите и незадоволството на граѓаните дури и со употреба на смртоносна сила, а демонстрациите ги координираат и круговите на протерани граѓани на Мјанмар во странство, кои протестите ги нарекоа „глобална пролетна револуција во Мјанмар“.
– Да го разбудиме светот со единството на луѓето во Мјанмар, истакнаа организаторите во соопштение.
Протести, во кои учествуваат и будистички свештеници, се одржуваат во Јангон, Мадалеј, Кале и Давеј, а според локалните медиуми, еден демонстрант бил застрелан во градот Хсипаву.
Во исто време, во оддалечените погранични области во источниот и северниот дел на земјата активни се помали етнички бунтовнички групи кои значително ги засилија своите вооружени акции по воениот удар пред 3 месеци, принудувајќи десетици илјади луѓе да бегаат, се вели во извештај на ОН.
Во централните делови на земјата, каде со децении има воени бази, се случуваат необјасниви експлозии, со спорадични ракетни напади врз воени позиции.
Во извештај на невладина организација за помош на политичките затвореници се наведува дека безбедносните сили од почетокот на протестите убиле 759 демонстранти.
Службата за односи со јавност на воената хунта не одговори на барањата на странските дописници да ги коментира денешните извештаи на локалните медиуми.