Адвокатот и изборен набљудувач Предраг Јовановиќ тврди дека тој и неговиот колега Никола Миладиновиќ биле нападнати од тројца мажи во белградската населба Ѕвездара. Според неговото сведоштво за телевизијата Н1, напаѓачите ги удирале со метални шипки и палки, а еден од нив извадил пиштол, го репетирал и му рекол „пукај“.
Јовановиќ раскажал дека отишол во близина на стадионот „Инге“, откако добил информација дека таму било претепано едно лице. На местото пристигнал со колегата, адвокатот Никола Миладиновиќ, каде што затекнале повреден човек. Додека се подготвувале да повикаат полиција, им се приближиле тројца мажи вооружени со палки.
Јовановиќ тврди дека им се претставил како адвокат и ја покажал својата легитимација, но тоа не ги спречило мажите да тргнат кон нив. Во нападот, според неговото сведоштво, тој, неговиот колега и уште едно лице добиле удари во главата, рацете и нозете.
Во продолжение, Јовановиќ опишал како еден од напаѓачите извадил пиштол, го вперил кон него и му рекол „пукај“. Откако го слушнал репетирањето на оружјето, почнал да бега. Во тој момент застанал автомобил, а возачот им дозволил да влезат во возилото, со што успеал да се спаси.
Во моментот кога разговарал со Н1, Јовановиќ се наоѓал во Итната медицинска помош, каде што му била укажана лекарска помош поради повредите.
Нападот се случил на 25 октомври, кога во Србија се одржуваат предвремени парламентарни избори. Во текот на изборниот процес, набљудувачките мисии пријавиле голем број неправилности.