Бизнисменот Јордан Камчев со лисици на рацете врзани зад грбот, бил легнат на земја, претресуван надвор од затворот при што затвореници му се исмевале. Тоа се случило на 5 октомври при неговиот спровод од затворот Шутка до Јавното обвинителство за организиран криминал и е целосно спротивно на Правилникот за постапување на лица лишени од слобода, пишува Република. 

Адвокатот на Камчев, Тони Менкиноски, денеска побара од судијата во предметот „Плацеви на Водно“ за кое претпладнево се одржа рочиште, да се вклучи во постапката за, како што рече, последното нарачано изживување врз Камчев кое од страна на овластени лица се случило на 5. октомври 2021 година, при неговиот спровод од затворот Шутка до Јавното обвинителство за организиран криминал. Согласно наредбата дадена од Судот, Камчев истиот ден бил спроведен до ЈО за организиран криминал во врска со предмет кој е во истрага.

Одбраната на Камчев смета дека судијата кој е надлежен за случајот, е единствен орган кој моментално се грижи за основните слободи и права на Камчев и затоа бара од него да преземе дејствие и да се вклучи во постапката за последното нарачано изживување врз Камчев.

Во текот на спроводот спротивно на начинот и методологијата на спроведувањето лица лишени од слобода на понижувачки и деградирачки начин г. Јордан Камчев е спроведен од затворот Шутка до просториите на Јавното обвинителство за организиран криминал. Притоа, ваквото однесување на овластените лица кои постапувале по Вашата наредба е надвор од Законот за полиција и не е во соодветност со правилникот за постапување на лица лишени од слобода. Должни сте да го испитате случајот, бидејќи Вие сте во моментов единствениот орган кој се грижи за основните слободи и права на г. Камчев. Доколку сакате и доколку сметате, околу фактичкиот настан, да ви објаснам, дека г-динот Камчев бил легнат на земја, јавно претресуван. Лисиците, тоа го виде и обвинителката, лисиците му беа толку многу врзани на задниот дел на телото што немаше крв во рацете, спротивно на Правилникот за постапување на лица лишени од слобода. Барам од вас да преземете дејствие и да се вклучите во постапката – му се обрати адвокатот Тони Менкиноски на судијата.

Бев претресуван надвор од зградата, меѓу двете комбиња и се исмејуваа затвореници надвор, од прозорите, значи не во внатрешен дел, туку на трева. И прв пат ми беа лисиците позади грб врзани и стегнати и не можев да седам во комбето бидејќи клупата беше само 20-30 сантиметри и цело време се седеше на земја. Беше едноставно изживување. Толку сакам да кажам. Тоа се констатираше отпосле и со повредите на рацете. Го пријавив настанот во Обвинителството – рече Камчев.

Бидејќи изживувањето врз Камчев континуирано продолжува, одбраната конкретно за овој случај ќе поднесе кривични пријави за овластените одговорни лица кои го вршеле спроводот, ќе поднесе жалба до Народниот правобранител на РСМ и ќе ја дополни апликацијата која е веќе испратена до Европскиот суд за човекови права во Стразбур.

Тортурата и изживувањето кое се врши врз Камчев веќе станаа тема и во меѓународната јавност. За неговиот случај и третманот на кој е подложен Камчев овие седум месеци, декларирајќи го веќе како политички затвореник пишуваа досега три меѓународни, реномирани медиуми „EU Reporter“, „The European Post“ и „The Times of Israel“.

Се чини дека сѐ погласните реакции на меѓународната јавност во кои отворено се зборува за случајот на Камчев и тој се класифицира како изживување, некому не му се доволен сигнал дека на крајот ќе мора некој да одговара и да сноси сериозна одговорност за сиот незаконски третман, изживување и тортура.