Повеќе од 391 000 корисници на крипто-берза од Турција останаа без своите токени откако основачот на берзата ги украде нивните пари и ја напушти државата. Корисниците останаа без пристап до своите сметки и до своите финансии, пренесе Tom’s Hardware.
Загубите на клиентите би можеле да достигнат до 2 милијарди долари, а бројот на оштетени клиенти може да надмине и 391 000, тврдат адвокатите на оштетените. Ова го пренесе сајтот IT.mk.
Thodex со над 700 000 корисници е, или барем беше, една од најголемите крипто-берзи во Турција. Властите во Турција веќе уапсија 62-ца осомничени од осум турски градови во кои оперирал Thodex. Полицијата и натаму е во потрага по шеснаесет луѓе поврзани со берзата, помеѓу кои и основачот на берзата. Властите во Турција издадоа меѓународна потерница по основачот Фарук Фатиџ Озер кој пребегал во Албанија.
Основачот на берзата тврди дека бројката на оштетени корисници е многу помала и изнесува околу 30 000 корисници. Тој тврди дека ќе ги обештети клиентите и инвеститорите, пренесе Bloomberg.
Само неколку по затворањето на Thodex властите во Турција поради измама ја затворија и платформата Vebitcoin и уапсија четворица од нејзините основачи. Пред да ја затворат, дневно на Vebitcoin во просек се тргуваа крипто-валути во вредност од 60 милиони долари.
Дел од турските граѓани купуваат крипто-валути за да ги заштитат своите заштеди од инфлацијата и од падот на турската лира. Властите во Турција забранија купување со крипто-валути и најавија брза регулација на пазарот.