Државниот јавен обвинител Љупчо Коцевски го доби предлогот за своето разрешување од Советот на јавни обвинители. Барањето е поднесено од Владата, а Коцевски ќе треба да го разгледа и писмено да се произнесе во законски предвидениот рок.
Како што информираат од обвинителството, Коцевски ќе го разгледа предлогот и ќе достави своето мислење до Советот на јавни обвинители. Предлогот за разрешување е испратен денеска. Според изјавата на претседателката на Советот, Душица Димитриевска, по добивањето на мислењето од Коцевски, ќе биде закажана седница за разгледување на наводите.
Мустафа Хајрулахи поднесе кривична пријава против државниот обвинител Љупчо Коцевски
Со оваа одлука, започнува законскиот рок од две недели за Советот да даде мислење за разрешувањето на Коцевски. Без оглед на исходот на седницата на Советот, конечната одлука за разрешувањето на Коцевски ќе се донесе во Собранието.
За негова смена ќе биде потребно мнозинство од 61 глас „за“ во парламентот.
Предлогот за разрешување на Коцевски доаѓа по серија обвиненија дека под негово водство обвинителството било неефикасно, а обвинителот изнесувал информации за судски постапки, што е спротивно на законот. Коцевски ќе има можност лично да го изнесе своето мислење во Собранието кога ќе се разгледува неговото разрешување.
Извор: Алсат