Џо Бајден: Заслужив четиригодишен мандат, но ќе ја предадам штафетата на новата генерација

Џо Бајден рече дека заслужува втор четиригодишен мандат, но личните амбиции мора да се остават настрана заради зачувување на демократијата.

„Верувам дека моите достигнувања како претседател, моето лидерство во светот, мојата визија за иднината на Америка заслужуваат втор мандат“, рече Бајден, пред да изјави дека повлекувањето е „најдобриот начин да се зближи нашата нација“.

Во обраќањето до нацијата, актуелниот претседател објасни дека одлучил да се повлече од изборите за да ја предаде палката на „нова генерација“.

Јас го направив мојот избор и тоа е Камала Харис, сега се зависи од гласачите, додаде Бајден. „Постои време и место за долго искуство во јавниот живот. Има место и време за нови гласови, свежи гласови, помлади гласови. И тоа време е сега“, рече тој.

Бајден рече дека ќе се фокусира на преостанатите шест месеци од неговото претседателствување, ќе работи на намалување на трошоците за работниците, развој на економијата, одбрана на граѓанските права, правата на глас и борба против политичкиот екстремизам и насилство.

„Ќе продолжиме да собираме коалиција на горди земји за да го спречиме Путин да ја преземе Украина и да направи поголема штета. Ќе го одржиме НАТО посилен и пообединет од било кое време во нашата историја“, вети претседателот.

Тој рече дека ќе работи на завршување на војната во Газа и враќање на израелските заложници киднапирани од палестинската група Хамас.