Европската комисија предлага инвестициите во транспортната инфраструктура да бидат удвоени и да надминат 50 милијарди евра во следниот долгорочен буџет на Европската Унија. Претседателката на Комисијата, Урсула фон дер Лајен, истовремено повика на создавање вистинска Европска транспортна унија, со инфраструктура приспособена на потребите во следните децении.
Во обраќањето пред учесниците на конференцијата „Денови на поврзување на Европа 2026“, Фон дер Лајен нагласи дека политичкото проширување на Европа мора да биде проследено и со нејзино физичко поврзување.
Таа потсети дека во минатото железничките мостови и модернизираните патишта придонесувале за надминување на политичките и историските поделби на европскиот континент.
„Одржувањето на она што го имаме повеќе не е доволно. Треба да изградиме транспортен систем за следните децении. Време е за вистинска Европска транспортна унија“, рече претседателката на Европската комисија.
Според Фон дер Лајен, завршувањето на Трансевропската транспортна мрежа – TEN-T, која опфаќа железници, патишта и внатрешни водни патишта, би можело значително да придонесе за економскиот раст на Унијата.
Процените покажуваат дека целосното завршување на мрежата би можело до 2050 година да го зголеми бруто-домашниот производ на Европската Унија за 2,4 проценти, односно за приближно 467 милијарди евра.
Како дел од плановите за подобра поврзаност, директната брза железничка линија меѓу двата главни града треба до 2030 година да го намали времетраењето на патувањето на околу пет часа. До 2034 година, патувањето по истата линија би требало да трае приближно три часа.
Фон дер Лајен оцени дека брзата железничка врска на милиони патници ќе им понуди побрза и поодржлива алтернатива на авионскиот сообраќај.
Покрај изградбата и модернизацијата на инфраструктурата, претседателката на Европската комисија ја истакна и потребата Европа да ја задржи водечката позиција во транспортните иновации.
Како приоритетни области ги посочи електрификацијата на камионскиот транспорт и развојот на автономните возила.
Фон дер Лајен нагласи дека европската транспортна мрежа треба да биде поотпорна и на последиците од климатските промени, особено на поплавите, екстремните суши и другите временски појави што можат да ја загрозат инфраструктурата.