Околу 87.000 луѓе се собраа денеска во Париз на протест против пензиската реформа, соопшти полицијата, а синдикатот ЦГТ, еден од организаторите на состанокот, објави дека има повеќе од 500.000 граѓани.
Полицијата сè уште не даде проценка за бројот на луѓе на протестите низ целата земја, додека ЦТГ вели дека 2,8 милиони демонстранти учествувале низ Франција, протестирајќи против зголемувањето на старосната граница за пензионирање од 62 на 64 години.
Во главниот град, маршот го предводеа синдикалните лидери собрани зад транспаренти на кои пишуваше „Ние кажуваме НЕ за пензиските реформи и подолг работен век“, како на првиот голем митинг на 19 јануари, кога повеќе од милион луѓе учествуваа во демонстрациите низ земјата.
Митинзи денеска се одржаа и во другите големи градови: во Марсеј со околу 40.000 учесници, според полицијата, во Рен со 23.000 и во Нант со околу 28.000.
Француските власти соопштија дека денеска штрајкувале 25,92 отсто од просветните работници, додека синдикатите проценуваат дека тој број е 50 отсто.
Пензиската реформа, клучен проект од вториот петгодишен мандат на претседателот Емануел Макрон, предвидува поместување на старосната граница за пензионирање од 62 на 64 години и продолжување на периодот за плаќање придонеси.
И покрај незадоволството на граѓаните, властите не се откажуваат од таа реформа, а премиерката Елизабет Борн неодамна изјави дека нема да има преговори за старосната граница за пензионирање.
За предлог-законот за пензиските реформи во Собранието беа поднесени дури 7.000 амандмани, од кои 6.000 поднесе само левицата.