Европската Унија има свои вредности, но за жал не ги почитува во некои конкретни области, а една од тие области која директно ги засега Македонија и регионот е политиката на проширување, која воопшто не функционира, смета Фуере,
– Тоа е неуспех на Европската Унија целосно да ги разбере негативните последици од последните ќорсокаци и бугарското вето, не само врз шансите за процесот на пристапување кон ЕУ, туку и врз граѓаните кои ја гледаа перспективата во европската иднина, оценува Фуере во интервју за 24 Вести.
Тој смета дека Унијата во моментов се соочува со многу серозни крстопати, па затоа треба да биде внимателна, бидејќи може негативно да влијае врз чувствата на граѓаните од регионот.
– Со тоа ЕУ не ги почитува своите ветувања, не ги почитува своите заложби кон регионот. Ако потфрли во своето непосредно соседство, тогаш повеќе нема смисла за ЕУ. Така што Европската Унија мора итно да го промени однесувањето, вели Фуере, додавајќи дека Брисел не презема доволно мерки против оние нејзини членки кои ги поткопуваат европските вредности.
Според него, ветото на Бугарија за евроинтеграцискиот процес на земјава е срамен чин на бугарската Влада, но тоа е и срамен чин за ЕУ затоа што не успеа да спречи една своја земја членка „да ја киднапира политиката на проширување“ и да ја промовира својата националистичка агенда на начин кој е во спротивност со сите вредности на ЕУ.
– Се воодушевувам на истрајноста на македонската Влада и особено на граѓаните на кои им беа дадени многу ветувања за прифаќање на Преспанскиот договор, со перспектива дека тоа ќе ја отвори вратата за членство во ЕУ и преговори за членство, а на секој чекор бевте напуштани од ЕУ. Неуспех е на ЕУ што не го одржа ветувањето на многу флагрантен начин и мислам дека тоа покажа недостиг на разбирања во ЕУ од опасностите што и се закануваат ако продолжи со ваквата полктика, вели Фуере, додавајќи дека јазикот и политиката што ја користи Бугарија се империјалистички и претставуваат рецидив од 19-от век.