Германија се подготвува значително да ја намали квотата за работници од Западен Балкан. Мерката ќе ги засегне и македонските граѓани кои планираат да заминат на работа преку „Западнобалканската регулатива“.
Според најавите, новата владина коалиција на CDU/CSU и SPD планира годишниот лимит за работници да го намали од сегашните 50.000 на 25.000 лица. Со тоа системот би се вратил на нивото што важеше пред две години.
„Западнобалканската регулатива“ со години е една од наједноставните и најкористените патеки за легално вработување во Германија.
Таа им овозможува на граѓаните од Македонија, Албанија, БиХ, Косово, Црна Гора и Србија да добијат работна виза дури и без формално признаена квалификација, односно диплома. Услов е да имаат конкретна понуда од работодавач и одобрение од германската Агенција за вработување.
Официјалното образложение за намалувањето на квотите е зголемениот тренд на невработеност во Германија и желбата за построга контрола врз трудовата миграција.
Сепак, ваквиот потег отвора сериозна контрадикторност во германската јавност. Германските работодавачи веќе подолго време предупредуваат дека земјата и понатаму се соочува со голем недостиг на работна сила во клучни сектори, меѓу кои градежништвото, угостителството и услужните дејности.
Поради тоа, тие бараат пофлексибилен систем наместо нови административни бариери.
За македонските граѓани, кратењето на квотата на половина значи многу поголема конкуренција, подолги чекања за виза и помал простор за добивање термини во амбасада.
Бидејќи визите се распределуваат според месечни лимити за секоја земја поединечно, процесот за заминување на работа во Германија ќе стане значително потежок.