Адвокатот Влатко Илиевски, сопруг на поранешната министерка за внатрешни работи Гордана Јанкулоска, во интервју за МИА изјави дека Европскиот суд за човекови права (ЕСЧП) го документирал предвременото и неправично судење на Јанкулоска во случајот „Тенк“, поврзан со купувањето на владин мерцедес.

Илиевски посочи дека веќе од постапката пред Основниот и повисоките судови било очигледно дека нема фер судење.

„И во самата пресуда беше јасно истакнато дека Груевски и Поповски биле поттикнати од Јанкулоска, иако на Јанкулоска воопшто не ѝ беше судено во таа постапка. Нам ни беше јасно дека еднакво е осудена однапред, а повисоките судови ги игнорираа нашите жалбени наводи“, нагласи Илиевски.

Проблем со доказите и непристрасност на судиите

Адвокатот објасни дека одбраната немала пристап до сите прислушкувани снимки кои ги поседувало тогашното Специјално јавно обвинителство (СЈО), туку само до селектирани материјали.

„Легално, снимките ги имаше само СЈО, ниту судот имаше увид во целата збирка. Никој не можеше да ја контролира СЈО за тоа кои снимки се релевантни. Ова е сериозна повреда на член 6 од Конвенцијата за човекови права“, додаде Илиевски.

Илиевски укажа и на други повреди на правото на фер постапка, вклучително и експресната постапка за осудата, отсуството на контрадикторност при користење на вештачења, и предубеденоста и непристрасноста на претседателот на Судечкиот совет. Според него, ваквите злоупотреби содржат елементи на кривично дело „злоупотреба на службената положба и овластувања“.

Целосна рехабилитација и повторно судење

Илиевски потенцира дека крајната цел на одбраната е повторно судење и целосна рехабилитација на Јанкулоска.

„За да се повтори постапката, ЕСЧП треба да утврди повреда на член 6. Пријателско спогодување не би помогнало за повторно судење“, истакна тој.

Адвокатот додаде дека рокот за одговор на македонската Влада до Стразбур е до 5 март 2026 година, но реално може да биде пролонгиран до април. Целиот процес на комуникација, одговори и контра-излагања може да трае повеќе години.

Илиевски критикува дека националните институции, вклучително и Судскиот совет и Советот на јавни обвинители, се партизирани и не ги спроведуваат стандардите на судството, што ја отежнува реформата.

„Побрзо ќе се воспостават стандарди со развојот на вештачката интелигенција отколку преку националните институции“, додаде тој.