Американскиот милијардер Илон Маск предупреди дека Соединетите Американски Држави се соочуваат со ризик од финансиски колапс доколку не го забрзаат развојот и примената на вештачката интелигенција и роботиката. Според него, токму овие технологии би можеле да бидат клучни за справување со растечкиот јавен долг и идните економски предизвици.
Маск, чие богатство според „Форбс“ се проценува на околу 744 милијарди долари, во разговор за подкастот „Dwarkesh Podcast“ изрази загриженост поради наглото зголемување на американскиот државен долг. Тој оцени дека најголемата закана за земјата не се криптовалутите, туку неконтролираното зголемување на обврските на владата.
Според него, САД веќе трошат повеќе средства за отплата на камати отколку за својот воен буџет. Тој тврди дека американската влада годишно издвојува околу 1.000 милијарди долари само за каматите на јавниот долг.
Поради тоа, Маск рече дека се вклучил во работата на Одделот за ефикасност на владата (DOGE), со цел да се намалат непотребните трошоци и да се забави патот кон, како што го нарече, финансиски колапс.
„Илјада проценти ќе банкротираме како држава и ќе пропаднеме како земја без вештачката интелигенција и роботите“, изјави Маск.
Тој посочи дека уште претходно прогнозирал оти ерата на вештачката интелигенција може да донесе огромно зголемување на производството на стоки и услуги. Според него, таквиот развој би можел да предизвика пад на цените и дефлација, наместо продолжување на инфлаторните притисоци.
Маск предупреди и дека глобалната трка за развој на вештачката интелигенција може да има последици врз финансиските системи. Тој смета дека големите економии, меѓу кои САД и Кина, би можеле да печатат повеќе фиат-пари за финансирање на технолошкиот напредок, што би можело да ја намали вредноста на нивните валути.
Во повеќе наврати Маск го издвојува биткоинот како средство со ограничена понуда, за разлика од традиционалните валути кои можат да се зголемуваат преку монетарни политики. Неговите компании Tesla и SpaceX поседуваат значителни количини биткоини.
„Tesla“ моментално поседува 11.509 биткоини, додека „SpaceX“ има 18.712 биткоини. Во моментот на објавување на овие информации, вредноста на еден биткоин изнесува нешто повеќе од 64.000 долари.
Маск неодамна даде и дополнителни предупредувања за иднината на вештачката интелигенција. Во интервју за списанието „The Economist“ изјави дека за околу пет години AI технологијата би можела да ја надмине вкупната интелигенција на сите луѓе заедно.
„До 2036 година луѓето речиси сигурно повеќе нема да ја контролираат таа технологија“, изјави Маск.