Во Катар се очекуваат повеќегодишни последици врз извозот на природен гас откако беа оштетени клучни енергетски капацитети. Според „КатарЕнерџи“, дел од инфраструктурата за производство на течен природен гас е ставена вон функција.
Извршниот директор на компанијата, Саад ал-Кааби, изјави за Ројтерс дека надвор од употреба се две од вкупно 14 производствени линии за ЛНГ, како и еден од двата објекти за претворање на гас во течност. Поради тоа, производството е намалено за околу 17 проценти.
Погодените капацитети, како што наведе, учествуваат со околу 12,8 милиони тони годишно производство на ЛНГ. Поправките, според проценките, би можеле да траат од три до пет години, во зависност од безбедносните услови и техничките рокови.
Се очекува прекинот да предизвика околу 20 милијарди долари годишни загуби на приходи, што претставува еден од најголемите удари врз снабдувањето со кои се соочила компанијата.
Ал-Кааби посочи дека ситуацијата може да доведе до преиспитување на договорите со долгорочни купувачи, меѓу кои се Италија, Белгија, Јужна Кореја и Кина. Тој додаде дека компанијата би можела да се повика на виша сила доколку прекините продолжат.