Масакр во Канада
Страшна трагедија го потресе малото канадско гратче Тамблер Риџ во покраината Британска Колумбија, каде во масовно пукање во средно училиште загинаа девет лица, а 25 се повредени. Две од жртвите биле пронајдени на друга локација – во куќа за која се претпоставува дека е поврзана со нападот. По крвавиот инцидент, осомничениот стрелец си го одзел животот, додека мотивот за нападот засега не е познат.
Десетмина мртви на две локации
Премиерот на покраината, Дејвид Еби, информираше дека вкупно десет лица се мртви на две различни места. Осуммина биле убиени во училиштето, меѓу кои и осомничениот напаѓач, за кого се верува дека починал од самонанесена прострелна рана. Дополнително, 25 лица со различни повреди се хоспитализирани.
Полицијата уверува: Нема дополнителна закана
Надлежните органи соопштија дека во моментов нема други осомничени поврзани со нападот. Од полицијата уверуваат дека жителите на Тамблер Риџ не се изложени на дополнителна опасност и дека ситуацијата е под контрола.
„Катастрофален ден за заедницата“
Министерката за јавна безбедност и главен обвинител на покраината, Нина Кригер, изјави дека иако алармот на Кралска канадска коњичка полиција е укинат, заедницата останува во состојба на длабока криза. Таа го опиша настанот како еден од најлошите масовни напади во историјата на покраината и земјата, нагласувајќи дека станува збор за катастрофален ден за блиската заедница.
Овој масакр се смета за најсмртоносен училиштен напад во Канада во изминатите неколку децении.