Германија беше сведок на масовен протест во Минхен против екстремната десница, каде што над 200.000 луѓе излегоа на улиците. Демонстрантите се собраа во Терезиенвизе, познатата локација каде што секоја година се одржува Октоберфест.
Организаторите тврдат дека бројката достигнала 320.000 учесници, многу повеќе од очекуваното. Слични протести беа организирани и во Хановер, Росток и други германски градови, во знак на отпор кон екстремно десничарските политики.
Протест во Минхен против растот на екстремната десница
Демонстрантите носеа транспаренти со пораки против Алтернатива за Германија (AfD), екстремно десничарска партија која бележи раст во предизборните анкети. Еден од најчестите слогани беше „Расизмот и омразата не се алтернатива“.
Протестот беше мирен и поддржан од бројни организации, меѓу кои активистички групи, Филмскиот фестивал во Минхен, верски заедници и фудбалските клубови ФК Баерн и ТСВ 1860.
Подемот на AФД и загриженоста во Германија
Партијата Алтернатива за Германија постои веќе 12 години и во 2017 година влезе во германскиот парламент, благодарение на поддршката што ја доби по мигрантската криза.
Сега, во пресрет на општите избори на 23 февруари, АФД е втора најсилна партија во анкетите, што предизвикува загриженост кај граѓаните.
Протестите во Минхен и низ Германија испратија силна порака против екстремизмот, во период кога земјата се подготвува за клучни избори.