Поранешната германска канцеларка Ангела Меркел ја оцени убедливата победа на Алтернатива за Германија (АфД) во Саксонија-Анхалт како „шокантна“ и како пресвртница во поновата историја на земјата. Таа порача дека демократските партии мора да го сменат начинот на кој комуницираат со граѓаните и појасно да го објаснуваат постигнатиот напредок.
– Ова е едноставно шокантно – рече таа денеска во интервју за време на саемот за технологија во Келн.
Нејзината Христијанско-демократска унија (ЦДУ) доживеа тежок изборен пораз и освои само дел од поддршката што ја имаше на претходните избори.
– Како членка на ЦДУ, ова многу ме боли. Ова е пресвртница, вистинска пресвртница во историјата на Сојузна Република Германија – рече Меркел, која беше германска канцеларка од 2005 до 2021 година.
На парламентарните избори во Саксонија-Анхалт во неделата, АфД освои 43,8 проценти од гласовите. ЦДУ доби 17,2 проценти, додека Социјалдемократската партија (СПД) падна на 9,3 проценти. Левицата освои 8,6 проценти, Зелените 8,9 проценти, а популистичко-левичарскиот сојуз БСЊ 5,3 проценти.
Меркел оцени дека изборниот резултат покажува оти е потребно политичарите поинаку да им се обраќаат на граѓаните. Според неа, демократските партии мора многу поактивно да бараат директен контакт со луѓето, што денес е поважно отколку порано.
Таа изрази загриженост и поради тоа што фактите, според неа, имаат сè помало влијание врз дел од јавноста, додека емоциите стануваат доминантни во политичките дебати. Како пример ја посочи токму Саксонија-Анхалт, каде што економските показатели се подобриле, но дел од граѓаните очигледно не го чувствуваат тој напредок.
– И потоа лидерот на АфД, Улрих Зигмунд, вели: Можеби, но луѓето не се чувствуваат така – рече Меркел во врска со економските индикатори во покраината Саксонија-Анхалт.
Поранешната канцеларка нагласи дека не смее да се дозволи ваквиот пристап да стане доминантна позиција во општеството.
– Дофатот на просветителството беше токму во тоа што луѓето можеа да се согласат за заеднички ставови врз основа на факти. Доминацијата на емоциите над фактите би значела цивилизациска регресија. Ако преовладаат чувствата, а фактите престанат да бидат мерка за реалноста, тоа би бил цивилизациски чекор назад – рече поранешната германска канцеларка.