Министерот за здравство, Арбен Таравари, потврди дека уште една жртва од трагичниот пожар во дискотеката „Пулс“ во Кочани починала. Починатиот е Александар Карадакоски, управител на дискотеката, кој беше на лекување во Литванија поради сериозните изгореници.
Почина Александар Карадаковски – управителот на дискотеката „Пулс“ во Кочани
Таравари изјави дека Карадакоски, кој имал 40% изгореници на телото, страдал од откажување на бубрезите на 1 април. Тоа довело до потреба од дијализа. За жал, утрово беше потврдено дека тој ја изгубил битката за живот.
Министерот изјави дека инфективните компликации поради големата површина на повредите биле главниот фактор што довел до смртта.
„Неговата состојба беше критична, но за жал не успеа да се опорави. Се надеваме дека другите пациенти во критична состојба ќе се стабилизираат и ќе се вратат во земјата“, изјави Таравари.
Пожарот во дискотеката „Пулс“ се случи на 16 март, а ова е 60-тата жртва од трагедијата која ја потресе Кочани и Македонија. Министерството за здравство започна процедура за враќање на телото на Карадакоски во земјата.
Очекувањата се дека повеќе детали ќе бидат објавени на прес-конференцијата која ќе се одржи во 13:30 часот во Министерството за здравство.
Извор: Миа