МОНЕ НАДМИНА ОЧЕКУВАЊА НА АУКЦИЈА ВО ПАРИЗ: „Утро во Ветеј“ продадено за 10,2 милиони евра

Рекордни продажби за дела на францускиот импресионист

Сликата на Клод Моне „Утро во Ветеј“, насликана во 1901 година, е продадена за речиси 10,2 милиони евра на аукција во Париз. Наддавањето се одржало во аукциската куќа „Сотби’с“, објави „Ле Фигаро“.

Во истата продажба, друго дело на Моне, „Островите во Порт-Вил“ од 1883 година, достигнало цена од 6,45 милиони евра.

Дела со историска вредност и рекордни цени

Двете слики се насликани со разлика од околу 20 години и го прикажуваат текот на Сена во близина на Живерни, каде што живеел уметникот.

Од аукциската куќа наведуваат дека станува збор за рекордни цени за дела на Моне продадени во Франција, од отворањето на меѓународниот пазар во 2000 година. Сликите претходно биле во приватни колекции речиси еден век.

„Утро во Ветеј“ била проценета меѓу 6 и 8 милиони евра, додека „Островите во Порт-Вил“ се очекувало да достигне меѓу 3 и 5 милиони евра.

Рекорд на Моне на глобално ниво

Највисоката цена постигната за дело на Моне досега изнесува 110,7 милиони долари. Таа била платена за сликата „Стогови сено“, продадена во Њујорк во 2019 година.