Родители на загинатите во пожарот во Диско клубот „Пулс“ во Кочани формираа жив штит пред Кочанската болница, спречувајќи ги властите да ги пренесат телата на нивните деца во Скопје за обдукција. Пожарот, што избувна утринава, однесе 59 млади животи на возраст од 14 до 25 години, главно од Кочани, а родителите, гневни и очајни, бараат да им бидат предадени телата за да ги подготват за погреб.
Родители во Кочани: Гнев и очај пред болницата
Родителите, собрани пред Кочанската болница, изразија длабоко незадоволство поради долгото чекање.
„Цел ден стоиме тука пред болницата, а никој не ни кажува ништо. Цел свет знае зошто и како умреа нашите деца. Што уште чекаме? Нема да ги дадеме телата на нашите деца!“, изјавија родителите, полни со болка и гнев.
Тие инсистираат веднаш да им бидат предадени телата за да можат да ги подготват за погреб, одбивајќи ги процедурите за обдукција во Скопје.
Полициско обезбедување и преговори
Пред болницата е распоредено засилено полициско обезбедување за да се спречат инциденти.
„На местото пристигна обвинителка од Скопје, која се обидува да им ја објасни на родителите процедурата за обдукција и понатамошните чекори“, соопштија од полицијата.
Неколкумина од родителите заминаа на разговори со претставници на институциите.
„Дел од родителите отидоа на преговори со надлежните за да се договорат за наредните постапки околу телата на загинатите“, потврдија локални извори.
Izvor: 24инфо