Пет возила беа зафатени во пожар што избувнал попладнево на улицата „Лазар Личеноски“ под скопското Кале, спроти Градскиот стадион.
Според информациите од Противпожарната бригада на Град Скопје, две возила целосно изгореле, додека три се делумно оштетени.
Пожарот бил пријавен во 15:40 часот, при што првично било наведено дека гори сува трева, смет и паркирани автомобили.
На терен интервенирале три противпожарни возила и осум пожарникари, кои успеале да го локализираат и целосно да го изгаснат огнот во 16:40 часот.
Од надлежните информираат дека пожарот е ставен под контрола и нема информации за повредени лица.