ОСОМНИЧЕН ЗА ПРИКРИВАЊЕ ОБИД ЗА УБИСТВО: Притвор за началникот на белградската полиција, Веселин Милиќ

Вишиот суд во Белград му одреди 30-дневен притвор

Вишиот суд во Белград денеска му одреди 30-дневен притвор на Веселин Милиќ, кој е осомничен дека како началник на Полициската управа за градот Белград извршил повеќе кривични дела со цел да прикрие тешко убиство во обид.

Случајот се однесува на инцидент што се случил на 12 мај во ресторан во населбата Сењак.

Од судот соопштија дека притворот е определен поради опасност од уништување, сокривање, изменување или фалсификување докази и траги од кривично дело.

Дополнително, како што се наведува, постои и можност да влијае врз сведоци, како и околности што укажуваат дека би можел да го повтори кривичното дело во краток временски период.

Истрагата опфаќа уште девет лица

Осомничениот вчера ја изнел својата одбрана на рочиште во Вишото јавно обвинителство во Белград.

Според наредбата за спроведување истрага, Милиќ се товари за кривични дела непријавување кривично дело и сторител, како и помагање на сторител по извршување на кривично дело.

Во рамки на истата истрага опфатени се уште девет лица.

Тие ќе бидат сослушани во обвинителството во законски предвидениот рок за притвор, а јавноста дополнително ќе биде информирана за текот на постапката.