ОТВОРАЊЕ НА ДОКУМЕНТИТЕ ЗА ЕПСТИН: Судот нареди јавноста да добие увид во истрагата

Судија во Њујорк официјално дозволи објавување на дел од документите поврзани со случајот на починатиот педофил Џефри Епстин, со цел јавноста да добие увид во материјалите кои со години беа недостапни. Одлуката опфаќа транскрипти од големата порота и истражни досиеја, кои досега беа целосно затворени за јавноста.

Окружниот судија Ричард М. Берман денеска пресуди дека материјалите мора да бидат објавени најдоцна до 19 декември. Документите потекнуваат од случајот што во 2019 година беше покренат пред њујоршкиот суд, каде Епстин се соочуваше со обвиненија за сексуално искористување и злоупотреба на десетици малолетни девојки. Обвиненијата се однесуваа на неговите имоти во Менхетен, Палм Бич и други локации.

Епстин, финансиер поврзан со богати и влијателни личности, почина во затворската ќелија во 2019 година, на 66-годишна возраст, пред започнување на судскиот процес. Обдукцијата ја класифицираше неговата смрт како самоубиство.

Одлуката на судијата следи по барањето поднесено минатиот месец од американската влада. Претходно, претседателот Доналд Трамп под притисок на Конгресот потпиша закон со кој се наложува обелоденување на документи и истражни досиеја поврзани со случајот „Епстин“. Судијата Берман јасно се повика на новиот закон како причина за неговата пресуда.

Според обвинителите, Епстин со години водел операција за трговија со луѓе за сексуална експлоатација, во која биле вклучени бројни млади жени, меѓу кои и малолетнички. Тој лично ги злоупотребувал жртвите.

Случајот првпат се појави пред судовите пред речиси две децении, кога Епстин се изјасни за виновен за дел од обвиненијата. Подоцна, предметот повторно беше отворен и Епстин повторно беше уапсен, а токму на тие постапки се однесува новонареденото објавување на документите.

Истиот њујоршки суд вчера го одобри и барањето на Министерството за правда за објавување на досиеја поврзани со Гислејн Максвел, долгогодишна соработничка на Епстин.