Наставнички од основните училишта „Лазо Трповски“, „Петар Поп Арсов“ и „Војдан Чернодрински“ се меѓу добитничките на престижното признание „Просветен работник на годината 2025/2026“, доделено на свечена манифестација што се одржа во Македонскиот народен театар. Признанијата беа врачени во организација на Здружението на просветни работници на Град Скопје, а градоначалникот Орце Ѓорѓиевски лично им ги додели наградите на најуспешните едукатори, избрани по претходно утврдени строги критериуми на јавен конкурс на кој право на учество имаа сите наставници и професори од главниот град.
Во рамки на свеченоста, посебно признание за својот значаен придонес во воспитно-образовниот процес доби наставничката по одделенска настава Надица Митевска од општинското основно училиште „Војдан Чернодрински“. За време на настанот, признание ѝ беше врачено и на Даниела Панајотова, стручен соработник, ментор и педагог во ООУ „Петар Поп Арсов“, додека плакета за успешно работење и покажана креативност во наставната дејност доби наставничката по биологија и хемија Даниела Радевска од училиштето „Лазо Трповски“. Ваквите признанија претставуваат потврда за долгогодишниот професионален труд и силен поттик за понатамошно вложување во едукацијата на младите генерации.
Покрај доделените плакети, наставниците на свечената манифестација добија и вредни награди во форма на компјутери, наменети како поддршка и признание за нивната секојдневна посветеност и професионален образовен ангажман.
