Обвинителите мора да постапуваат независно и да носат одговорност за предметите
Јавните обвинители треба да работат самостојно и без надворешни влијанија, порача републичкиот јавен обвинител Ненад Савески на денешниот брифинг со новинарите. Тој нагласи дека секој обвинител е директно одговорен за предметите што ги води и дека при постапувањето не смеат да постојат притисоци или финансиски пречки за прибирање докази.
Савески оцени дека комуникацијата со јавноста треба да ја водат обвинителите кои директно работат на случаите, а не само државниот јавен обвинител.
Се водат истраги за Груби, Кочани и се проверуваат старите предмети
Тој информираше дека истрагата поврзана со поранешниот вицепремиер Артан Груби продолжува и дека се преземаат истражни дејствија и се прибираат докази. Во однос на наводите за „фиоки“, Савески рече дека е направена контрола на старите предмети и не се утврдени значајни заостанувања.
Осврнувајќи се на истрагата за пожарот во Кочани, тој нагласи дека постапката не е запрена, туку влегува во нова фаза и се одвива според утврден план.
Вештачењата мора да се спроведуваат без оглед на трошоците
Савески истакна дека доказите мора да се обезбедат без разлика на финансиските трошоци, но со рационален пристап кога постојат повеќе решенија. Тој додаде дека подобро е постапка да се запре ако нема доволно докази, отколку да заврши со ослободителна пресуда.