Што е најдобро да јадете за здрави црева?: Експертите издвојуваат пет намирници

Исхраната има важна улога во здравјето на дигестивниот систем

Сè повеќе истражувања покажуваат дека секојдневната исхрана може значително да влијае врз здравјето на дебелото црево и врз ризикот од развој на колоректален рак, кој во последните години е во пораст и кај помладите луѓе.

Експертите посочуваат дека храната влијае врз воспаленијата, цревниот микробиом и состојбата на клетките во дигестивниот систем. Затоа нутриционистите издвојуваат неколку намирници што почесто треба да се внесуваат во исхраната.

Меѓу нив се киви, брокула, грав и мешунки, овес и малини.

Кивито и брокулата се издвојуваат поради влакната и антиоксидансите

Нутриционистката Кеси Тајнер вели дека кивито помага во подобрување на варењето и во одржување на здрав цревен микробиом.

– Кивито е богато со пребиотици, кои ги хранат добрите бактерии во дебелото црево. Здравиот и избалансиран микробиом е еден од најважните фактори за намалување на воспалението и одржување на здрави клетки на дебелото црево, што помага да се намали ризикот од колоректален карцином – вели Тајнер.

Според Јохан Кац, брокулата и другите крстоцветни зеленчуци содржат соединенија што помагаат во намалување на воспаленијата и во елиминација на штетни материи од организмот.

– Брокулата се издвојува затоа што не само што е богата со растителни влакна, туку содржи и глукозинолати кои помагаат во детоксикација на канцерогените материи и намалување на воспалението – објаснува Кац.

Гравот, овесот и малините помагаат за здрав микробиом

Гравот и мешунките се препорачуваат поради високата содржина на растителни влакна и отпорен скроб, кој стигнува до дебелото црево и создава корисни масни киселини.

Овесот, пак, содржи полифеноли и влакна што придонесуваат за подобро варење и намалување на холестеролот.

Нутриционистката Аманда Годман Рол вели дека полифенолите во овесот можат да помогнат во забавување на растот на клетките на ракот.

Малините се меѓу овошјата со највисока содржина на влакна и содржат елагитанини, соединенија што можат да помогнат во намалување на воспаленијата и оксидативниот стрес.

– Малините содржат соединенија наречени елагитанини, за кои истражувањата сугерираат дека можат да го инхибираат растот на клетките на ракот – вели Маша Дејвис.