Трамп: Протечените детали за договорот со Иран се неточни

Вашингтон реагира на протечени информации и изјави од Техеран

Претседателот на САД, Доналд Трамп изјави дека информациите што се појавиле во јавноста во врска со договорот меѓу САД и Иран не соодветствуваат на условите што биле договорени меѓу двете страни.

Во објава на својата социјална мрежа „Трут соушл“ (Truth Social), Трамп наведе дека иранските коментари за договорот не ја одразуваат реалната состојба на преговорите.

„Тоа што го кажаа, вклучително и нивната слаба и жална изјава за постигнување договор, нема никаква врска со вистината. Многу нечесни луѓе со кои е тешко да се работи. Со нив не постои нешто како преговори во добра волја. НЕВЕРОЈАТНО!“, напиша американскиот претседател.

Обвинувања за напад со беспилотни летала во Ормуската Теснина

Трамп исто така оцени дека е целосно неприфатлив нападот со беспилотни летала, за кој тврди дека Иран го извршил во текот на изминатата ноќ.

Според неговите наводи, цел на нападот биле индиски бродови кои ја напуштале Ормуската Теснина.

Тој порача дека ситуацијата бара поголема одговорност и брза реакција.

„Подобро е да станат поодговорни и тоа брзо!“, порача Трамп.