ТРАМП ВОВЕДУВА НОВИ ЦАРИНИ НА САД: Секоја земја ќе добие писмо со висина на царинската стапка

Почнува дипломатската офанзива – детали за договори и царини

Од денеска, Соединетите Американски Држави ќе почнат да испраќаат официјални писма до своите трговски партнери со конкретни детали за новите царини и можни трговски договори, соопшти американскиот претседател Доналд Трамп.

Писмата ќе бидат пратени од понеделник напладне, односно во 16.00 часот по Гринич, објави Трамп преку својата платформа „Трут Соушл“.

Трамп: Или договор, или царина – до 9 јули

• „Писмата со договори или царини ќе бидат испратени до различни земји низ светот од понеделник напладне (16.00 по Гринич)“, изјави Трамп, најавувајќи завршување на постапката „до 9 јули – или со писмо или со договор“.

Американскиот претседател уште во април најави основна царина од 10% за речиси сите увозни производи, но со дополнителни „реципроцитетни“ давачки за земјите кои имаат трговски суфицит во однос со САД. Тие мерки беа замрзнати за 90 дена, рок што истекува токму оваа недела.

Хауард Латник: Новите мерки ќе важат од 1 август

Министерот за трговија, Хауард Латник, прецизираше дека новите царински мерки ќе стапат на сила од 1 август.

Според Белата куќа, примарната цел на овие економски чекори е поттикнување на другите земји да ги намалат трговските бариери за американски производи и да се воспостави порамнотежена трговска размена.