Васил Јованов осуден на 12 години затвор за трагедијата во центарот на Скопје
Возачот Васил Јованов, кој во јануари годинава смртно ја прегази 24-годишната Фросина Кулакова на пешачки премин во центарот на Скопје, денеска доби казна затвор од 12 години. Основниот кривичен суд во Скопје го прогласи виновен за тешки дела против безбедноста на луѓето и имотот во сообраќајот.
„Судот е мафија“ – бурна реакција на таткото на жртвата
По изрекувањето на пресудата, таткото на загинатата Фросина, Тодор Кулаков, со гнев извика: „Судот е мафија!“
Реакцијата следеше по огорченоста на семејството. Тие сметаат дека казната не е доволна за тежината на делото.
Судијката Снежана Марковска наведе дека отежнувачки околности за Јованов се неговите претходни сообраќајни прекршоци и тоа што и покрај нив, повторно сел зад воланот. „Станува збор за дрско и безобѕирно однесување,“ истакна Марковска.
Без возачка, пијан и со 90 км/ч – ударот што го одзеде животот на Фросина
Трагедијата се случи во јануари, кога Васил Јованов управувал возило без возачка дозвола, под дејство на алкохол и со брзина од 90 километри на час. Тој ја удрил Фросина Кулакова додека таа преминувала улица на обележан пешачки премин. Девојката починала на лице место.
Иако Јованов изрази каење, вина и жалење, судот сепак пресуди висока казна, со оглед на сериозноста на делото и последиците што ги предизвикал.
Васил Јованов призна вина за смртта на Фросина – семејството на Кулакова бара максимална казна!
Пресудата ја слушнаа и двете семејства — и Кулакови и Јованови, во сала исполнета со емоции, гнев и тага.