Три лица загинаа, а најмалку 13 се повредени во тешка сообраќајна несреќа на булевар во софиската населба Челопечене. До трагедијата дошло откако автомобил, кој според досегашната истрага учествувал во нелегална улична трка, движејќи се со брзина поголема од 150 километри на час, удрил во автобус од градската линија 119 и го превртел на страна. Бугарското обвинителство смета дека двајцата возачи, осомничени дека се тркале по сообраќајницата, се директно одговорни за несреќата.
Двајца патници од автобусот починале, а подоцна и трет повреден маж
Меѓу загинатите се двајца патници од автобусот, на возраст од 27 и 31 година. Едниот починал на местото на несреќата, додека другиот им подлегнал на тешките повреди во болница. Подоцна починал и трет маж, кој бил хоспитализиран во болницата „Св. Ана“.
Меѓу повредените има лица со сериозни повреди на главата, скршеници и повеќекратни трауми, а дел од нив се наоѓаат во критична состојба. На местото биле испратени десет екипи на брзата помош, кои ги пренеле повредените во неколку софиски болници.
Обвинителството се сомнева дека се одвивала импровизирана улична трка
Заменик-градскиот обвинител на Софија, Ангел Канев, изјавил дека досега собраните докази укажуваат дека станувало збор за импровизирана трка меѓу два автомобили. Според него, автомобилот со огромна брзина странично удрил во автобусот, по што возилото на јавниот превоз се превртело во одводен канал покрај патот.
Истражителите утврдиле дека на коловозот речиси и да немало траги од кочење, што дополнително укажува дека автомобилот се движел со екстремно висока брзина непосредно пред ударот.
Во едниот автомобил имало две лица, а во другиот тројца. Според обвинителството, дел од учесниците немале важечки возачки дозволи, додека во едното возило настанала и расправија околу тоа кој управувал со автомобилот во моментот на несреќата.
Тестовите за присуство на алкохол и наркотични супстанции биле негативни, но биле земени и дополнителни примероци за анализа. Еден од автомобилите по судирот продолжил неконтролирано да се движи и уништил автобуска постојка оддалечена околу 25 метри од местото на ударот.
Сообраќајниот правец бил затворен со часови
Несреќата предизвикала целосен сообраќаен колапс во североисточниот дел на Софија. Патниот правец кон Казичене и Челопечене бил затворен неколку часа, додека полициските, противпожарните и форензичките екипи вршеле увид и ги отстранувале остатоците од коловозот.
Градоначалникот на Софија, Васил Терзиев, изразил сочувство до семејствата на загинатите, додека бугарските власти најавиле темелна истрага за околностите под кои се случила една од најтешките сообраќајни трагедии во главниот град во последните години.