Српскиот претседател Александар Вучиќ подготвува одлуки за помилување и аболиција на дел од лицата поврзани со настаните во Србија во изминатата година и пол. Тој сè уште не открива конкретни имиња, но најави дека одлуките ќе се однесуваат на луѓе „од двете страни“.
Во изјава за Радио-телевизија Србија, Вучиќ посочи дека сè уште работи на подготовката на одлуките. Информацијата за најавените помилувања и аболиција ја пренесе и српскиот неделник НИН.
„Станува збор за дел од луѓето кои учествуваа во сè што се случуваше во земјата во последната година и пол, од двете страни. Многумина ќе бидат изненадени од овие помилувања и аболицијата“, изјави Вучиќ.
Тој објасни дека едната одлука ќе се однесува на лица за кои веќе се донесени правосилни пресуди. За лицата против кои нема правосилна пресуда ќе се применуваат поинакви правила.
Според Вучиќ, целта на одлуките е да придонесат за помирен живот во Србија и за подобро меѓусебно разбирање.