Изградба на систем кој е отпорен на влијанија и кој гарантира законско и наменско трошење на средствата на сите даночни обврзници треба да овозможи идната соработка меѓу Министерството за финансии и Државниот завод за ревизија преку заеднички активности дефинирани во меморандум, што денеска го потпишаа ресорната министерка Гордана Димитриска Кочоска и главниот државен ревизор Максим Ацевски.
Двете институции се обврзуваат на побрз трансфер на информации при сомнежи за измами и незаконски активности насочени против финансиските интереси на државава и на Европската унија.
– Нашата обврска е секој денар од домашните буџетски средства, како и секое евро од европските фондови, да биде потрошено законски, наменски, одговорно и во интерес на граѓаните – порача министерката за финансии Гордана Димитриеска Кочоска по потпишувањето на меморандумот.
Министерството за финансии и Државниот завод за ревизија, како што рече министерката, потврдуваат јасна политичка и професионална определба за силни институции, одговорно управување со јавните средства и нулта толеранција кон корупцијата.
– Ова партнерство не е само административен чекор, туку суштинска реформа, која дава основа за подобра координација, поголема транспарентност и поефикасна заштита на јавните средства – оцени Димитриеска Кочоска.
Меморандумот е дел од активностите предвидени со Акцискиот план за спроведување на Националната стратегија за борба против измами и заштита на финансиските интереси на Европската Унија во Република Македонија, со кој се унапредува координацијата меѓу Министерството за финансии и Државниот завод за ревизија и директно придонесува кон зајакнување на контролните механизми и заштитата на финансиските интереси на Европската Унија во нашата земја.
– Иницијативата за Меморандумoт за соработка меѓу двете институции е резултат на добрата пракса во земјите-членки на Европската унија и воспоставува рамка за соработка во повеќе области од заеднички интерес, овозможува размена на искуства, знаења и податоци, унапредување на професионалните капацитети и примена на европските стандарди, со една заедничка цел градење посигурен, поефикасен и поодговорен систем на јавни финансии – рече Димитриска Кочоска.
Таа укажа дека оваа соработка има директно значење и за успешноста на евроинтеграцискиот процес потенцирајќи дека размената на информации и координацијата во областа на Поглавјето 32 – Финансиска контрола, се особено важни за унапредување на реформите и за подготовката и спроведувањето на препораките од Европската комисија.
– Нашата цел е да продолжиме со целосно усогласување и примена на меѓународните стандарди на врховните ревизорски институции – ISSAI и со постојано јакнење на системот на јавна финансиска контрола – потенцираше министерката за финансии.
Ацевски укажа дека се операционализира размената на информации неопходни за успешните мониторинг и оценски мисии на Европската комисија.
– Нашата соработка ќе се фокусира на целосна имплементација на меѓународните стандарди на Врховните ревизорски институции и донесените декларациите од Меѓународната организација на ВРИ (INTOSAI). Со тоа, ние не само што го усогласуваме нашето национално законодавство, туку градиме ревизорска пракса која е препознаена и почитувана на европско и меѓународно ниво. Министерството за финансии и Државниот завод за ревизија заеднички ќе работат на унапредување на системот за внатрешна финансиска контрола во јавниот сектор (PIFC), преку преглед и дискусија на консолидираните годишни извештаи и следење на имплементацијата на владините заклучоци – наведе Ацевски.
Еден од столбовите на соработка, посочи тој, е директно поврзан со „Стратегијата за борба против измами и заштита на финансиските интереси на Европската Унија во Република Македонија 2026-2030“. Како корисници на фондовите од Европската унија, презедовме сериозна обврска да воспоставиме ефикасен систем за превенција, откривање и третман на неправилностите и измамите. Државниот завод за ревизија, како активен член на АФКОС мрежата, ќе ја засили соработката со Одделението за координација на борбата против измами (АФКОС одделението) во Министерството за финансии. Овој Меморандум ни овозможува побрз трансфер на информации при сомнежи за измами и незаконски активности насочени против финансиските интереси како на Република Македонија, така и на Европската Унија. Нашата визија е јасна: држава без измами и корупција, каде заштитата на јавниот интерес е врвен приоритет“. Преку заеднички активности за проценка на ризици, ние ќе ги идентификуваме ранливите точки во системите за управување со фондовите и ќе предлагаме конкретни мерки за нивно ублажување – рече Ацески.
Според него, потпишувањето на овој Меморандум претставува воспоставување на бескомпромисен систем на институционална синергија, која преку конкретна примена на меѓународните ревизорски стандарди и операционализација на АФКОС мрежата, гарантира дека секој денар од даночните обврзници е заштитен од неправилности и измами.
– Уверен сум дека со заеднички напори, користејќи ја експертизата на двете институции, ќе успееме да изградиме систем кој е отпорен на влијанија и кој гарантира законско и наменско трошење на средствата на сите даночни обврзници – наведе директорот на ДЗР.
Меморандумот отвора простор за размена на знаења и искуства преку работни средби, работилници, конференции, семинари, обуки и други форми на професионално усовршување. Вработените од Државниот завод за ревизија ќе можат да се вклучат како предавачи во обуките што ги организира Министерството за финансии преку Секторот – Академија за јавни финансии, додека експертите од Министерството за финансии ќе можат да придонесат во програмите за континуирано професионално усовршување на вработените во Државниот завод за ревизија.
Предвидена е и редовна размена на стручна литература, сметководствени и ревизорски стандарди, методолошки прирачници, годишни програми за ревизорски активности, како и конечни ревизорски извештаи и акциски планови подготвени од јавните субјекти. Двете институции ќе работат и на подигнување на јавната свест за превенција и препознавање на неправилностите и измамите.