Зголемување на плати, извоз и уплати во буџетот од ТИРЗ зоните
Просечната нето плата исплатена од компаниите во технолошко-индустриските развојни зони за 2025 година е зголемена за 6% во однос на 2024 година. Податоците се објавени од директорот на Дирекцијата за ТИРЗ Гоце Димовски.
Во исто време, компаниите од ТИР зоните во 2025 година уплатиле повеќе од 6,3 милијарди денари во државниот буџет. Тоа претставува раст од 10,5% во однос на 2024 година.
Димовски наведува дека извозните резултати исто така бележат раст. Вкупниот извоз на компаниите од ТИР зоните за првиот квартал од 2026 година е зголемен за 11% во однос на истиот период од 2025 година.
Дополнително, вкупниот извоз за целата 2025 година е зголемен за 6,5% споредено со 2024 година.
Раст на БДП и резултати во работењето на институцијата
Според податоците, шест квартали по ред е забележан раст на БДП од 3,5%. Тоа се случува во период кога растот во повеќето европски економии е значително понизок.
Од Дирекцијата за ТИРЗ соопштуваат и за подобрување во институционалното рангирање. Во 2025 година институцијата се наоѓа на второ место по усогласеност со утврдените стандарди за системот за интегритет, според извештајот на ДКСК.
За споредба, во 2023 година била на 38 место, а во 2024 година на 15 место.
„Она што во изминатата година и половина го работевме напорно со главна цел реструктуирање на економијата и консолидирање на институциите, денеска ги дава своите резултати!“, наведува Димовски во објавата.