Потребни се повеќе средства за приспособување
Македонија се соочува со зголемен ризик од суша, поради што се неопходни поголеми финансиски средства за спроведување мерки за приспособување кон климатските промени, оценуваат од Центарот за климатски промени по повод Светскиот ден за борба против опустинувањето и сушата.
Оттаму посочуваат дека медитеранските земји, меѓу кои и Македонија, сè почесто се соочуваат со подолги сушни периоди, помалку врнежи и постојан раст на температурите.
Последици врз водните ресурси и земјоделството
Според Центарот, климатските промени директно влијаат врз водните ресурси, земјоделството и стабилноста на локалните заедници. Последиците сè почесто се изразуваат и преку економски загуби и зголемена социјална ранливост.
Алатката за процена на ризиците и ранливоста на локалните заедници, изработена во рамките на проектот „Green B-LEAF“, покажува дека подготвеноста на општините во медитеранските региони останува ограничена и покрај зголемената изложеност на климатски ризици.
Повеќе региони се оценети како ранливи
Националните анализи покажуваат дека значителни делови од Североисточниот, Скопскиот, Вардарскиот, Пелагонискиот и Југоисточниот Регион се ранливи на суша. Како особено чувствителни се издвојуваат Скопската и Штипската Котлина, како и Овчеполието.
Од Центарот нагласуваат дека сушата е еден од најсериозните предизвици на современите климатски промени и бара координиран, навремен и интегриран одговор. Потребни се зајакнување на институционалните и локалните капацитети, подобро планирање и обезбедување средства за мерки за адаптација.