Тежок пожар попладнево изби во атарот на село Макази, Општина Ресен, истовремено на најмалку две локации, а поради опасноста од негово ширење кон Националниот парк „Пелистер“ ангажирани се Ер-трактори и дополнителни тимови на Дирекцијата за заштита и спасување (ДЗС), информира директорот на ДЗС Стојанче Ангелов.
Ангелов посочи дека пожарот започнал покрај неколку овоштарници со јаболка, а додека пожарникарите се обидувале да го стават под контрола, се појавила подолга огнена линија на друга локација, што, според него, укажува дека пожарот е намерно подметнат.
– Денес попладне изби тежок пожар во атарот на село Макази, Општина Ресен. Пожарот започна покрај неколку овоштарници со јаболка, на најмалку две локации истовремено. Додека пожарникарите се обидувале да го стават под контрола, се појавил оган подалеку од таму, и тоа подолга огнена линија, што укажува на тоа дека овој пожар е намерно подметнат – вели Ангелов.
Пожарникарите се обидуваат да спречат огнот да го премине асфалтираниот пат и да ги заштитат околните овоштарници. Поради опасноста пожарот да навлезе во територијата на Националниот парк „Пелистер“, Ангелов вели ангажирани се Ер-тракторите на ДЗС.
– Истовремено, поради тежината на пожарот и можноста истиот да навлезе во територијата на Националниот парк Пелистер, наредив да полетаат Ер Тракторите на Дирекцијата, коишто веќе започнаа со дејство – вели Ангелов.
На терен се и два огнени тима со Пинцгауери на ДЗС, кои им помагаат на пожарникарите од Ресен, додека се бара можност за пресекување на пожарот од горната страна, во насока на Националниот парк.
– Исто така, веднаш наредив да дојдат два огнени тима со Пинцгауери на Дирекцијата за заштита и спасување. Истите се овде и им помагаат на пожарникарите од Ресен огнот да не се движи преку асфалтираниот пат. Истовремено бараме пат каде што ќе го пресечеме од горната страна, во насока на Националниот парк Пелисте – додава Ангелов.
На местото е и директорот на Националниот парк „Пелистер“, кој ангажирал механизација за изработка на противпожарни пресеки меѓу огнената линија и паркот.
– На лице место е и директорот на Националниот парк Пелистер, којшто веќе ангажираше механизација, со којашто ќе се обидеме да направиме противпожарни пресеки помеѓу линијата на огнот и Националниот парк Пелистер, бидејќи доколку овој пожар продолжи да се шири низ шумата, има опасност да ги зафати боровите насади, а потоа ќе имаме тежок проблем со неговото гаснење – рече Ангелов.
Информираше и дека во текот на денот се регистрирани повеќе од 30 пожари на отворен простор, при што дождот што паднал на некои места не придонел значително за намалување на опасноста.
– Денес во текот на денот имаме повеќе од 30 пожари на отворен простор. Тоа што на некои места падна дожд воопшто не ја олесни нашата работа. Затоа апелирам до граѓаните да бидат исклучително внимателни, бидејќи работиме пожртвувано, даваме сѐ од себе, но нашите сили се исцрпени. Секојдневното гаснење на десетици пожари во секоја општина ги исцрпува локалните пожарникари, но ги исцрпува и државните ресурси – рече Ангелов.
Извор: Курир