Инвестиции во патната инфраструктура до крајот на 2025 година
Директорот на ЈПДП, Коце Трајановски, најави значајни инвестиции во патната инфраструктура, кои ќе опфатат изградба на нови обиколници, автопатски делници и рехабилитација на регионални патишта.
„Во моментов се подготвуваме за проектирање на обиколницата околу Кавадарци. Паралелно, проектите за обиколници кај Ресен и за обиколницата што ќе ја поврзува Битола со Меџитлија се речиси завршени. Наредната година планираме да започнеме со проектирање на патниот правец од Куманово до Страцин,“ изјави Коце Трајановски, директор на ЈПДП.
Подобрување на врските со Албанија преку нов тунел
Како дел од стратегијата за унапредување на патната инфраструктура, ЈПДП планира изградба на тунел за поврзување на Македонија со Албанија.
„Планираниот тунел ќе биде замена за постојниот пат преку Ќафа Сан, овозможувајќи побрзо и побезбедно патување меѓу Македонија и Албанија. Со албанската Влада веќе постигнавме прелиминарен договор за заедничко финансирање на овој проект,“ изјави Трајановски.
Рехабилитација на регионални патишта
Во моментов се изведуваат активности за подобрување на патната инфраструктура на регионалниот пат кој ги поврзува Штип и Карбинци.
„Инвестиравме околу 30 милиони денари за овој патен правец, кој е од витално значење за жителите на двете општини,“ изјави Иван Јорданов, градоначалник на Штип.
Иновации за работа во зимски услови
За продолжување на градежната сезона и во зима, ќе се користи технологија на зимско асфалтирање со специјални адитиви, како и работа во ноќни смени за побрза реализација на проектите за патна инфраструктура.