Непријателствата во Сирија по речиси 12-годишната војна се дополнителен предизвик за хуманитарците кои се обидуваат да им достават помош на луѓето погодени од разорниот земјотрес од понеделникот во кој во Турција и Сирија загинаа повеќе од 22.000 луѓе.
Конвојот се обидел да се пробие од регионот под контрола на Сириските демократски сили (СДФ) предводени од Курдите во областа под контрола на бунтовничките фракции поддржани од Турција, непријателот против кој често се бореа во граѓанската војна.
Извори на двете страни меѓусебно се обвинуваат за тоа што конвојот не поминал обвинувајќи се дека ја политизираат помошта. Конвојот носел ознаки на курдската администрација, а во него имало цистерни со гориво. Чекал со часови на преминот.
Џаван Ибрахим, портпаролот на курдската администрација, ја обвини Турција, која има војници на северозападот на Сирија, и некои бунтовнички фракции дека спречиле минување на конвојот. Турските власти порачаа дека тоа апсолутно не е точно и дека Турција не ја блокира помошта.
Сириски опозициски извори обвинија дека СДФ се обидува да ја исполитизира ситуацијата барајќи пратките помош да носат ознаки на СДФ, што е чувствително прашање поради војната.
Турција спроведе три воени операции во северна Сирија против сириските Курди кои ги смета за закана за националната безбедност поради нивната поврзаност со Работничката партија на Курдистан (ПКК), која Анкара ја смета за терористичка организација.
Ибрахим кажа дека курдската администрација, која ги контролира сириските нафтени полиња на истокот на земјата, преговара со другите страни, особено со меѓународните партнери, за да ја увери другата страна да ја пропушти помошта.
Помошта на ОН од Турција за северозападот на Сирија, каде околу четири милиони луѓе зависат од неа, беше привремено суспендирана поради земјотресот, но вчера беше обновена. САД побараа од сириските власти веднаш да дозволат преминување на помошта преку сите гранични премини.
Турција порача дека преговара за отворање граничен премин кој води во територијата под контрола на сириската влада за помошта да може да се испрати директно таму. Анкара бара и отворање нов граничен премин кој ќе води во бунтовничкиот регион Идлиб.
Сириската влада, која е под западни санкции, побара од ОН помош поради земјотресот истакнувајќи дека помошта мора да биде координирана со Дамаск и испорачана од сириската територија, а не преку турската граница во подрачјата под контрола на бунтовниците.