Центарот за управување со кризи (ЦУК) упати сериозен апел до сите граѓани да го користат единствениот број 112 одговорно и исклучиво за вистински итни случаи. Ваквата реакција доаѓа откако институцијата забележа огромен прилив на повици кои воопшто немаат итен карактер, туку се однесуваат на секојдневни проблеми и барања кои не бараат интервенција.
Според официјалните податоци на надлежните, граѓаните на оваа линија често пријавувале меѓучовечки недоразбирања, барале општи информации или се обраќале за решавање на разновидни административни прашања. Од ЦУК предупредуваат дека секој ваков неоправдан повик директно го троши времето на дежурните оператори и непотребно ги оптоварува телефонските капацитети на системот.
„Важно е да се знае дека секој неитен повик го зафаќа времето на операторот и капацитетот на линиите. Во истиот момент, на помош може да чека лице чиј живот или здравје е загрозен, жртва на насилство, учесник во тешка сообраќајна несреќа или граѓанин соочен со друга реална опасност“, наведуваат од Центарот за управување со кризи.
Од службата потсетуваат дека повикот кон 112 е наменет строго за ситуации каде постои непосредна опасност врз животот, здравјето, личната безбедност, имотот или животната средина. Во такви околности е неопходно веднаш да реагираат полицијата, итната медицинска помош, противпожарните единици или други спасувачки институции.
„Доколку ситуацијата не бара итна реакција, обратете се до институцијата или службата надлежна за конкретниот проблем преку нејзините редовни контакт-канали“, посочуваат од институцијата.
Истовремено, апелот е насочен и кон јавните претпријатија, институциите, приватните компании и единиците на локалната самоуправа. Од нив се бара да не го посочуваат бројот 112 како контакт за општи информации, административни поплаки или за пријавување и евидентирање на материјална штета. Бројот 112 функционира како единствен европски број за итни случаи и мора да остане секогаш слободен и достапен за оние на кои секоја секунда им е од животно значење.