Делегација од Македонија учествува на еден од најголемите глобални настани за урбанизација
Министерот за локална самоуправа Златко Перински од денеска до крајот на неделата престојува во Баку, каде ја предводи македонската делегација на Светскиот урбан форум 13.
Настанот е еден од најзначајните глобални собири посветени на иднината на градовите, локалниот развој и одржливите заедници, организиран од UN-Habitat.
Според Министерството за локална самоуправа, форумот претставува меѓународна платформа на која се дискутираат теми поврзани со урбанизација, домување, климатски промени и инфраструктурен развој.
Се очекува учество на повеќе од 30.000 учесници од над 180 држави, меѓу кои претставници на влади, меѓународни организации, локални власти и академската заедница.
Обраќања и билатерални средби во рамки на форумот
На отворањето на форумот, министерот Перински ќе се обрати на националните сесии посветени на темата „Домување: Безбедни и отпорни градови и заедници“.
Тој ќе говори за досегашните искуства и идните насоки во спроведувањето на Новата урбана агенда, заедно со повеќе од 100 министри и носители на делегации.
Во текот на посетата се предвидени и билатерални средби со претставници од различни држави и организации.
Фокусот на разговорите ќе биде размена на искуства, јакнење на соработката, одржлива урбанизација и поддршка на локалниот и регионалниот развој.