Потпишани договор и план за имплементација
Град Скопје го направи првиот формален чекор кон спроведување на Меморандумот за соработка со УНДП. Со потпишувањето на договорот и планот за имплементација започнува реализацијата на три пилот-проекти од стратешко значење.
Градоначалникот Орце Ѓорѓиевски информираше дека со овој чекор визијата за развој се претвора во конкретни активности.
„Конкретни резултати за Скопје. Денес го направивме првиот формален чекор кон операционализација на Меморандумот за соработка помеѓу Град Скопје и УНДП, потпишан со постојаниот претставник во Македонија, г. Армен Григоријан, чекор со кој заедничката визија ја претвораме во конкретна, мерлива и одржлива акција,“ објави Ѓорѓиевски.
Три пилот-проекти за даноци, култура и чист воздух
Со потпишувањето на документите започнуваат активности во три клучни области.
„Со потпишувањето на Договорот и Планот за имплементација, започнуваме со реализација на три стратешки пилот-активности од клучно значење за иднината на нашиот град,“ наведува градоначалникот.
Првиот проект се однесува на репроценка на недвижниот имот во Општина Центар.
„Првиот проект опфаќа репроценка на недвижниот имот во Општина Центар, пилот кој ќе овозможи воспоставување на модерен, дигитален и целосно функционален систем за данок на имот. Ова значи поголема транспарентност, поефикасна наплата и посилна фискална стабилност на локално ниво,“ стои во објавата.
Вториот проект предвидува поддршка за организација на меѓународна конференција.
„Вториот проект е поддршка за организација на првата меѓународна конференција, со која Скопје го прави првиот крупен чекор кон реализација на визијата – Скопје како Европска престолнина на културата во 2028 година,“ наведува Ѓорѓиевски.
Третиот проект се однесува на подготовка на план за чист воздух.
„Третиот опфаќа изработка на првиот сеопфатен План за чист воздух заснован на докази, документ што ќе донесе јасни мерки, дефинирани одговорности, проценка на трошоци и конкретен патоказ за системско намалување на загадувањето, еден од најголемите предизвици со кои се соочува Скопје,“ се вели во објавата.
Поддршка од УНДП и нова развојна фаза за градот
Од Град Скопје ја истакнуваат улогата на УНДП во процесот.
„Градот Скопје особено ја цени експертската и техничката поддршка од УНДП. Нивната улога е клучна, од развој на дигитални системи, преку организација на меѓународни процеси, до подготовка на аналитички и стратешки документи. Ова партнерство ни овозможува да ги примениме најдобрите светски практики и да ги вградиме во работата на нашите институции,“ наведува Ѓорѓиевски.
Тој оценува дека ова претставува почеток на нова фаза за градот.
„Ова е почеток на нова развојна фаза за Скопје. Фаза во која градот станува поорганизиран, поодржлив, покултурно препознатлив и поеколошки одговорен,“ посочува градоначалникот.
Во објавата се упатува и благодарност за соработката.
„Благодарност до УНДП за довербата и партнерството, како и до сите институции и експерти кои ќе бидат дел од овие процеси. Скопје има потенцијал да биде модерен, европски и одржлив град. Денес го правиме првиот чекор во таа насока,“ додава Ѓорѓиевски.