По викендот одбележан со насилни протести низ цела Франција, се сумираат штетите кои се проценуваат на стотици милиони евра. Биле ограбени и уништени повеќе од 2.000 продавници, а владата се соочува со прашања зошто не предвидела ваква ескалација на насилството. Во меѓувреме, младите учесници во грабежите на ТикТок и на мрежата Икс објавуваат снимки на кои се фалат со украдените предмети и со судирите со интервентната полиција, пишува „Еуроњуз“.

Во едно видео објавено на ТикТок, млад човек го користи жаргонскиот назив „Панам“ за Париз и порачува: „Благодариме Париз, благодариме Панам. Екипо, убијци сте, сè уништивме“.

Очите му се црвени, веројатно од солзавецот, додека ги набројува украдените предмети и се фали со новата спортска облека. Потоа ѝ се обраќа на интервентната полиција (ЦРС).

„Бегавте, екипо, ве згазивме“, вели на крајот од снимката и додава: „Генерација Зет, респект“.

„Со ограбување заштедуваш пари“

Во друго видео, еден од учесниците во нередите му објаснува на новинар дека им се приклучил на протестите поради цените на горивата, кои ја погодуваат неговата мајка. Тој признава дека од продавница за спортска опрема украл облека и други производи. Неговото оправдување е едноставно: „На крајот на краиштата, со ограбување заштедуваш пари“.

Тој смета дека „Франција е расистичка и дека сите треба да бидеме еднакви“. Тврди дека претходно истиот ден бил избркан од ресторан во кој можеле да влезат Французи.

На забелешката на новинарот дека грабежите само ќе го зајакнат стереотипот за „Северноафриканецот кој краде“, тој одговорил: „Ако продолжиме вака, ќе настане хаос“.

Министерот призна: Ја изгубивме контролата

Расположението во владата е сосема поинакво. Францускиот министер за внатрешни работи Лоран Нуњез денеска јавно призна дека безбедносните сили во одреден момент ја изгубиле контролата.

„Во саботата, во некои поголеми градови, не можевте да ги погледнете трговците во очи откако им беа ограбени стотици продавници и да им кажете дека не сме ја изгубиле контролата“, изјави тој.

Нуњез потврди дека имало погрешна проценка при распоредувањето на безбедносните сили. Објасни дека во саботата низ целата земја биле ангажирани околу 60.000 полицајци и жандарми, но дека тој број не бил доволен за справување со бројните групи учесници во нередите и ограбувачи.

„Со оглед на причинетата штета, единствено исправно беше да поднесам оставка“, изјави Нуњез, но претседателот Емануел Макрон ја одби неговата оставка.

Штетата се проценува на стотици милиони евра

Протестите поради високите трошоци за живот, на кои во саботата се собраа околу половина милион луѓе, прераснаа во еден од најтешките бранови на насилство во Франција во последните години. Низ целата земја беа палени општински згради и ограбувани продавници.

Во Париз, групи маскирани мажи облечени во црни дуксери со капуљачи насилно упаѓале во продавници и ги кршеле металните заштитни ролетни. Од полиците земале цигари, очила за сонце, облека, накит и храна. Од супермаркетите излегувале со торби полни со колачи, сокови и алкохолни пијалаци.

Од една помала златарница биле украдени антиквитетни часовници, додека од продавница за оптика биле однесени сите очила за сонце.

Во некои продавници, ограбувачите ги кршеле фискалните каси од подот, иако тие веќе биле испразнети.

Претседателот на Стопанската комора, Ален Ди Крешенцо, изјави дека во целата земја биле погодени повеќе од 2.000 продавници. Вкупната штета ја процени на стотици милиони евра.

Во нередите биле уапсени повеќе од 2.500 лица, а речиси 1.000 припадници на безбедносните сили биле повредени. Меѓу демонстрантите исто така имало повредени, а еден од нив се здобил со тешки повреди на шаката откако бил погоден со полициска шок-бомба.

Министерот за правда Жералд Дарманен објави дека за време на викендот биле приведени повеќе од 2.330 лица, од кои 70 отсто биле полнолетни.