Актуелниот претседател на Соединетите Американски Држави, Доналд Трамп, упати остри критики до француските власти по повод масовните немири во земјата. Во најновата објава на социјалната мрежа Truth Social, тој ја оцени ситуацијата како директна последица на миграциските текови.
Трамп претходно изнесе слични тврдења на истата платформа, припишувајќи ја состојбата во Франција на приливот на луѓе од други делови од светот.
„Франција гори! Имиграцијата на луѓе од сосема поинаков свет, луѓе со омраза во срцата, ја уништи оваа некогаш голема земја. Затворете ги границите и преземете ја контролата пред да биде предоцна!“, рече тој.
Тој исто така сподели телевизиско видео од насилствата за време на протестите одржани во саботата. Во медиумскиот извештај беа прикажани жестоки судири меѓу полицијата и демонстрантите, опожарувања и уништување имот, иако како причини за граѓанскиот револт беа наведени незадоволството од образовниот систем и растот на трошоците за живот.
Американскиот потпретседател Џ.Д. Венс исто така ги поврза случувањата во Франција со миграциските политики на западните држави. Тој изјави дека западните либерали увезуваат население од посиромашните делови од светот под превезот на различноста и сочувството, притоа целосно игнорирајќи ги предизвиците поврзани со интеграцијата.
Бранот демонстрации првично започна на 17 септември во Кретеј, предградие на Париз, каде што средношколците и наставниот кадар побараа повеќе вработувања и подобрување на условите во училишните установи. Незадоволството набрзо се прошири низ повеќе градови, при што учениците започнаа со блокади на влезовите во образовните институции.
Барањата опфаќаат формирање помали паралелки, ангажирање дополнителни наставници, санација на дотраените објекти, поприфатлив распоред на наставата и поправеден систем за упис на факултетите. Кон собирите се приклучија ученици, професори и синдикални организации, по што образовните барања прераснаа во критики за економската и социјалната политика на власта.
Владата на Франција се обиде да ги смири тензиите преку најава за инвестиции во училиштата и дијалог со претставниците од образовниот сектор, но протестите продолжија и дел од нив ескалираа во физички судири.
Најмасовните собири беа организирани во сабота, на 17 октомври, кога според проценките на француското Министерство за внатрешни работи на улиците излегле околу 550.000 граѓани. Иако најголемиот дел од луѓето протестираа мирно, одредени насилни групи се судрија со безбедносните сили, нападнаа институционални објекти и демолираа трговски дуќани.
Голем одек во јавноста предизвика палењето на историското градско собрание во Лимож, додека нереди беа евидентирани и во Париз и други средини. Францускиот премиер Себастијан Лекорну во неделата соопшти дека за време на немирите биле уапсени 1.200 лица, а 150 полицајци се здобиле со телесни повреди.
На собирите присуствуваа и членови на движењето „Жолти елеци“, кое во 2018 година иницираше масовни демонстрации поради цените на горивата, поскапувањето на животот и класните разлики. Истовремено, синдикатите изразуваат револт против буџетските мерки за кратење на државниот дефицит, кои предвидуваат ограничување на јавните трошоци и замрзнување на основицата на платите за вработените во јавниот сектор.
Францускиот весник „Ле Монд“ наведува дека ваквите ставови на Трамп за миграцијата како примарен фактор за нередите се поклопуваат со наративите што ги пласираат медиумите поврзани со официјална Москва и одредени европски десничарски структури.
Кирил Дмитриев, специјален претставник на рускиот претседател Владимир Путин за односи со САД, ги оцени настаните како директен резултат на погрешните одлуки на европските институции и миграциската политика, посочувајќи ги санкциите против Русија и енергетските мерки како дополнителна причина за економската криза.
Медиумот заклучува дека ваквите толкувања ги занемаруваат изворните барања на француските граѓани за заштита на стандардот и јавните сервиси, со што реакцијата на Трамп претставува натамошно продлабочување на политичкиот спор за кризата со која се соочува претседателот Емануел Макрон.