-Во мигови како овој важно е да бидеме сплотени, со чесна мисла и со добри дела, само така ќе имаме мир и спокој во душите, но и во рамките на нашите можности ќе го менуваме општеството на подобро, напиша претседателот на ВМРО-ДПМНЕ Христијан Мицкоски во честитка по повод Божиќ упатена до поглаварот на Македонската православна црква, архиепископот охридски и македонски г.г. Стефан.

Лидерот на партијата Мицкоски вели дека најголемиот христијански празник Рождеството Христово – Божиќ е денот кога започнува спасението, зашто да не беше Божиќ, пишува тој во честитката, немаше да го имаме Велигден, а со тоа и Воскресението и Божјото спасение за луѓето.

-На трпезите оваа година, за жал, ќе имаме една горчина поради сè поголемата економска криза и немаштија и тоа се работите кои човека го оставаат нерамнодушен, но и треба да се голем поттик за работите да ги менуваме, а ќе ги менуваме заедно, со верба, надеж, знаење и мотив за иднина каква ја заслужува секој еден човек. Затоа сплотени и со верба во Бога да работиме за подобро, да создадеме услови кои ќе значат поттик и ослободување на интелектуалната сила и креација на секој еден човек, да ја ставиме на располагање секој движечка сила во функција на заедничкиот развој и промени кои ќе донесат иднина. Нека Христос ви подари мир и спокој, да ве води низ животот и да биде вашата сила, за хармонија, развој вам и на вашите семејства. Христос се роди!, пишува во божиќната честитка на лидерот на ВМРО-ДПМНЕ.