МИГРАНТИТЕ СЕ КЛУЧЕН ДЕЛ ОД ГЕРМАНСКИОТ ПАЗАР НА ТРУД: Во неколку професии сочинуваат повеќе од половина од вработените

Повеќе од една четвртина од вработените во Германија имаат мигрантско потекло, а во неколку професии нивниот удел надминува 50 отсто. Особено висока застапеност е забележана во здравството, угостителството, градежништвото и во други дејности во кои земјата се соочува со недостиг од работна сила.

Според првичните резултати од германскиот Микропопис за 2025 година, работниците со мигрантско потекло сочинуваат 27 отсто од вкупниот број вработени во Германија. Податоците на Сојузниот завод за статистика – „Дестатис“ покажуваат дека нивната улога на пазарот на трудот е особено значајна во повеќе професии.

Германската статистика како лица со мигрантско потекло ги определува оние што лично се доселиле во Германија по 1950 година, како и лицата чии родители пристигнале во земјата по тој период.

Најголемо учество на работници со мигрантско потекло е регистрирано меѓу готвачите, каде што тие сочинуваат 56 отсто од вработените. Во производството на храна нивниот удел изнесува 55 отсто, додека во дејностите поврзани со поставување подни облоги достигнува 54 отсто.

Во поставувањето скелиња и во преработката на месо, работниците со мигрантско потекло учествуваат со по 51 отсто. Тоа значи дека во сите овие професии тие сочинуваат повеќе од половина од вработените.

Нивната застапеност е висока и во повеќе дејности во кои Германија има недостиг од работна сила. Меѓу професионалните возачи, 41 отсто од вработените имаат мигрантско потекло, додека во хотелските услуги нивниот удел изнесува 40 отсто.

Во секторот за нега и грижа за стари лица, работниците со мигрантско потекло сочинуваат 33 отсто од вработените. Од друга страна, меѓу професиите што се соочуваат со недостиг од кадар, најмал удел е забележан во службите за итна помош, каде што изнесува седум отсто.

Германскиот Микропопис претставува годишно репрезентативно статистичко истражување со кое се опфаќа приближно еден отсто од населението. Објавените податоци за 2025 година се првични, а официјалниот статистички извештај содржи и информации за вработеноста, образованието, животните услови и други демографски и социјални карактеристики.

Според податоците на „Дестатис“, во Германија во 2025 година живееле околу 25,8 милиони лица со мигрантско потекло.