Портпаролката на Високиот комесаријат на ОН за човекови права на прес-конференција истакна дека еден тим на ОН може да оди во Полска, но нема дозвола да ја посети граничната зона, додека Белорусија го блокирала пристапот до цела нејзина територија.

– Бараме од властите на двете земји веднаш да дозволат пристап до граничните зони за претставниците на хуманитарните организации и организациите за одбрана на човековите права, за новинарите, адвокатите, како и претставниците на цивилното општество, посочи портпаролката на Високиот комесаријат на ОН за човекови права.

Таа додаде дека Високиот комесаријат исто така ги повикува Белорусија и Полска „итно да се справат“ со очајната ситуација во која се наоѓаат мигрантите и бегалците на границата помеѓу двете држави.

Тим на Високиот комесаријат претстојуваше во Полска од 29 ноември до 3 декември и иако немаше дозвола да ја посети пограничната зона, членовите на тимот се сретнаа со претставниците на Владата и на вцивилното општество и разговараа со 31 мигрант, кои пристигнале во земјата во периодот од август до ноември.

Портпаролката на Високиот комесаријат на ОН за човекови права истакна дека мигрантите состојбата од двете страни на границата ја опишале како очајна, каде или нема или има ограничен пристап до храна, вода и засолништа.