Советот на Општина Карпош, на својата 14. седница, донесе одлука за доделување еднократна парична помош на четири семејства чии најблиски го загубија животот во тешката сообраќајна несреќа на скопската обиколница, која се случи кон крајот на минатиот месец.
По 100.000 денари за секое починато лице
Од Општина Карпош изразија искрено жалење поради трагичниот настан. Како знак на солидарност и поддршка, локалната самоуправа ќе додели по 100.000 денари за секое починато лице.
Во несреќата згаснаа четири животи
Во трагедијата загинаа оперскиот пејач Ристе Велков (51), неговиот син Адам Велков (20), како и неговите другари Марко Ѓорѓиевски (20) и Петар Миланов (20).
Несреќата се случи откако камион ја пробил заштитната ограда на скопската обиколница, преминал на спротивната страна и директно удрил во автомобилот управуван од Ристе Велков. По судирот, возилото се запалило.
Поддршка за семејствата во најтешките моменти
Со доделената финансиска помош, Општина Карпош има цел барем делумно да им излезе во пресрет на погодените семејства во овие исклучително тешки моменти.