Курасао го постигна првиот мундијалски гол, но Германија немаше милост

Фудбалската репрезентација на Германија со убедлива победа го започна настапот на Светското првенство 2026, откако во првото коло од групата Е го совлада Курасао со 7:1. Иако дебитантот на мундијалите успеа да испише историја со својот прв гол на светските шампионати, германската селекција ја потврди фаворитската улога и без поголеми проблеми стигна до трите бода.

Уште во воведните минути беше јасно дека станува збор за дуел меѓу репрезентации со различен квалитет. Германците од самиот старт ја презедоа контролата и во 6. минута поведоа преку Лукас Нмеча, кој по асистенција на Флоријан Вирц погоди за 1:0.

Сепак, Курасао успеа да приреди историски момент за својата земја. Во 21. минута Комененсија го совлада Мануел Нојер и го постигна првиот гол на Курасао на Светските првенства, израмнувајќи на 1:1.

Германците го решија мечот уште пред паузата

Радоста на дебитантот траеше кратко. Само пет минути подоцна Нико Шлотербек, по изведен корнер, повторно ја врати предноста на Германија.

До крајот на првото полувреме „панцерите“ стигнаа и до трет погодок. Кај Хаверц беше прецизен од белата точка во 43. минута и ја зголеми предноста на 3:1.

Во второто полувреме германската репрезентација целосно го скрши отпорот на противникот.

Џамал Мусијала во 47. минута погоди за 4:1, а притисокот кон голот на Елој Рум продолжи и во остатокот од натпреварот.

Браун, Ундав и Хаверц ја заокружија убедливата победа

Натаниел Браун во 67. минута со атрактивен волеј стрелаше за 5:1, додека Дениз Ундав единаесет минути подоцна се запиша во листата на стрелците за 6:1.

Конечните 7:1 ги постави Хаверц во 88. минута. Германскиот напаѓач со прецизен лоб удар уште еднаш го совлада противничкиот голман и ја потврди убедливата победа на својот тим.

За Курасао останува историскиот прв погодок на мундијалите и драгоцено искуство од дебитантскиот настап на најголемата фудбалска сцена, додека тимот предводен од Дик Адвокат ќе се обиде да остави подобар впечаток во продолжението на турнирот.

Во следното коло Курасао ќе игра против Еквадор, а Германија ќе се соочи со Брегот на Слоновата Коска.

Германија – Курасао 7:1

Стрелци: Нмеча 6’, Комененсија 21’, Шлотербек 26’, Хаверц 43’ (пен.), Мусијала 47’, Браун 67’, Ундав 78’, Хаверц 88’.