Водата од градскиот водовод во Гостивар сè уште не е дозволена за пиење, но последните лабораториски анализи покажуваат значително подобрување на нејзиниот квалитет. Од Локалниот кризен штаб информираат дека активностите на терен продолжуваат, додека жителите во делови од градот и понатаму добиваат алтернативно снабдување со вода, објави ТВ21.
Се обезбедува техничка и флаширана вода
Во четири населени места се врши дистрибуција на техничка вода, додека на пет определени точки продолжува поделбата на флаширана вода за пиење. Со техничка вода се снабдуваат Дебреш, Беловиште, Фаснери и Тулана. Обезбедена е вода и за одделението за дијализа, а количините за пиење се обезбедуваат преку Владата, општествени организации, приватни компании и бизнис-секторот.
Подобрени резултатите од анализите
Според информациите од кризниот штаб, последните физичко-хемиски и биолошки анализи покажуваат значително подобрување. Резултатите во однос на количината на хлор и биолошките параметри се оценети како добри, што создава очекување водата наскоро да биде повторно ставена во употреба.
Сè уште се чека официјална потврда
И покрај позитивните резултати, за повторно користење на водата за пиење потребна е официјална потврда од здравствените власти. До нејзиното добивање, останува во сила препораката водата од водоводната мрежа во Гостивар да не се користи за пиење. Во меѓувреме, се очекува да се зголеми и количината на вода во населените места каде што во текот на денот има понизок притисок.